Како прославлю тя бедными усты и языком моими, аще не ты сам разделиши чудный дар твой слова златаго, воспевати тя?

Великому в чудотворцех тезоименитый восприял молитвами покровителя своего небесного кротости образ и воздержания учительство, просвещая ими паству свою.

Тебе, Пречистая, от юности своея не страстьми обдержим, но похвалы воспевая Тебе непрестанно, упокоиться сподобился под чудным покровом Твоим.

Ты, Предивная Одигитрие, восприяла под кров Свой святителя в Бозе почившаго, и нас не остави вне Покрова Своего, тебе славу воспевающих.

Во аере прелетая, яко Моисей кротчайший о народе своем, молитву усердную совершал еси, возвращающи гнев Божий на обуянных неверствием посылаемый.

Якоже Христос на Фаворе явился еси в ризах сияющих, убеленных учеником Своим, остатися и всегда пребывати тамо в кущах просящим, тако и ты в храме Преобразившагося собирая паству свою, научал Богу славословити: “Господи, добро есть нам зде быти”.

Пред правители предстояй, не сам помышляше, что глаголати, но от Христа наставляем бывал еси, како отвещавати, гнев гонителей в милость прелагая веры благовествованием.

В лютую испытаний годину, внегда супостаты богохранимый град ратовали, смерти, глада, мраза, огня не убоялся еси, паствы своея не оставил еси, моляся непрестанно о даровании над врагами победы.

Воистину и равноапостольные труды понесл еси в земли Галльской, вторым Дионисием явился еси, собирая воедино рассеянных, являя собою пастыря заблудшим, возвращая отпадших в лоно Церковное, проповедью мира Божиего и мир Победившаго.

Слова служителем явился еси, словесами своими словесное стадо утешая в скорбях, болезнях, трудах; враждующих умиряя, разделившихся соединяя, научая мир в сердца стяжати и Царя мира славити во вся веки.

Церкви хитон нечестивыми раздираемый, молитвами и словесы своими богодухновенными сшивал еси, любовию ротящихся обличая, правдою ограждая и престол русских градов матери во ограде Церкви Русской сохраняя.